Ministrja e Punëve të Jashtme dhe Diasporës, Donika Gërvalla është takuar me deputetin e Rumanisë në Asamblenë Parlamentare të Këshillit të Evropës, njëherit, Kryesues i Grupit të Aleancës së Liberalëve dhe Demokratëve për Evropën (ALDE), Lulian Bulai.

Finalizimi i procesit të anëtarësimit të Republikës së Kosovës në Këshillin e Evropës pas mbështetjes prej 82% të votave që i dha Asambleja e Përgjithshme anëtarësimit në KiE dhe fuqizimi i bashkëpunimit në rrugën euroatlantike të Kosovës, ishin temat kryesore të këtij takimi, shkruan Arbresh.info.

Gjatë këtij takimi Gërvalla falënderoi Bulai dhe grupin ALDE në KiE për mbështetjen e madhe gjatë diskutimit në Asamblenë Parlamentare në ditën e votimit, votën pro anëtarësimit në KiE si dhe gjatë gjithë këtij procesi.

“Republika e Kosovës është e vendosur në rrugën e saj euroatlantike përmes forcimit të ekonomisë, demokracisë, sundimit të ligjit dhe të drejtave të njeriut.”, thuhet në komunikatën e MPJD-së./Arbresh.info/